Къарачияр
Йиф. МичӀи кӀвале кравутдал ксанвайди уьтери кьатӀуз жезва. Зажигалкадин экуьналди дакӀардай кӀвализ чинрал кьеркьер алайбур гьахьзава. Абур чеб чпихь галаз кушкушдалди рахазва.
1-дишегьли. Сандух кравутдин кьилихъ галайди я.
1-итим. Явашдиз, ахварай ават тавурай.
2-итим. Куьне кямир. Сандух за ахъайда.
1-дишегьли. КъекъечӀ анихъ. Пул и пипӀе авайди я. Кравутдал ксанвайди уях жеда.
2-дишегьли. Ву-в! И кӀвале вуж ава? Я инсанар, я къуншияр, ибур вужар я?
2-итим. Гьараймир! Чна вак кядач.
2-дишегьли. Бес квез вуч кӀанзава?
2-итим. Чаз недайди, хъвадайди, пулни алукӀдайди. 2-дишегьли. Ву-в! Куьн къачагъар яни?
1-итим. Къачагъар ваъ, тӀалабиз атанвай къарачияр.
2-дишегьли. Куьн вужар я-е? Куьн заз чидай хьтинбур я эхир?
1-дишегьли. Къачу багъламаяр.
2-дишегьли. Абур за квез кӀватӀнани, я кьейбур? Тухумир зи шейэр.
1-дишегьли. Вун тек я, чи хзанар — чӀехи. Чаз кӀвалах амач, мажиб гузмач. Амма нез-хъваз, алукӀиз виридаз кӀанзава. (Къаралтуяр кӀваляй экъечӀа)
2-дишегьли. Тухвана, я кьейбур. Зи кӀвал тарашна-а!
2-перде
Хуьруьн юкьвал алай майдандал акваз-акваз югъ ачух жезва. Кьве пата авай гьаятрай мал-лапагдинни къушарин, инсанрин ванср къвезва. Са варцяй Залму экъечӀда, ада гъвечӀи стол, чӀехи сумкадай шей-шуьй акьудна туьквен ачухда.
Перис (гьаятдай). Киш-ш, садни амачиз гиликьайбур. Квез тӀегъуьн атурай, я Рабби!
Залму. Уях хьана йикъан ничхир. Йифиз члада гьахьна, ада гьина вуч жезватӀа, ахтармишда. Амма юкъуз... Юкъуз адан я кӀвачер секин жедач, я мез. Къекъведа-рахада. Рахада-къекъведа. Чидач, залумдин рушаз идакай-адакай акьван шикет-хибет гьинай гьатдатӀа. Адаз Къарачи гьавайда лугьузвайди туш гьа!
Перис. (гьаятдай) Угь ви иеси кьий иесисуз хьайиди. Вуна зи фередиз кӀуф вучиз язава?
Залму. ТӀветӀерихъ-ветӀерихъ галазни бягьсина авай кас я. ГьинвачтӀани чарадан верч, кӀек адан гьаятдиз атанва.
Перис. Вун экв малум желалди чарадан гьаятдал вучиз ала, я къарагуьлле? Жуван хайратри тварциз кӀуф ядалди, къуншийрин тум хкатайбуру тарашна куьтягьзава. Киш садра жуван харапӀадиз!
Залму. ЭкъечӀна хьайитӀа, вичин гафариз яб гузва лугьуз, я заз къаргьишда, я за хайибуруз-хвейибуруз.
Варцяй Перис экъечӀда, адан са гъиле тахтадин кӀус ава, муькуь гъилик ведре ква
Перис. (Къаншарда авай варарихъ туьквен акуна, вичи вичиз) Какадилай йис твадайда ахъайнава вичин базар. Вуна кӀватӀзавай кьванди гьинизда, я гуж хьайидан руш? Акъатуй ви нефс, я первердигар. Гила идакай, и Залму лугьудай залумдин рушакай, фалчини хьава. Пахлаяр вегьез. Ви кьилиз къалум хьурай гьа фендигарвилер, инсанарни, Аллагьни алцурарзавай иблис! (Тахтадин кӀусуналди лакар кӀватӀиз ведредиз вегьеда)