КӀвал хъиткьинна
Сад лагьай перде
1-шикил
Гьар са шей эцигна диганвай кӀвал. Багъдиз акъатнавай дакӀар ачух я. Дивандал ацукьна Интизара чемоданда пек-лек твазва. Ам шехьзава. Патав гвай кӀваляй мурмурар ийиз Сардаров экъечӀда. Цлал алай сятиниз килигда.
Сардаров. Тади ая, тади ая. Заз ахпадал вегьез тежедай агъзур дерди авайди я.
Интизар. Ийизва, ийизва. Са декьикьадилай зи кам и харапӀада хъжедач. Бес я за вавай эхай кьванбур. Эгь, буба, буба. Къаргъиш гьикӀ ийин за ваз? Тавуна тан гьикӀ ийин?
Сардаров (Гуьзгуьдал фена спелрал тӀуб алтадиз). Дуьз лугьузва вуна. Вири гьадан тахсирар я. Гужуналди алкӀурна ада вун зал. Яшаризни килигнач. 40 йисалай алатнавай заз 25 йиса авай руш гана. Гужуналди.
Интизар (Алай чкадилай кьудгъунна). Таб я! Вун я адаз минетчи хьайиди! Вун я адан къуллугъдикай менфят къачун патал зи гуьгъуьнай акъат тавурди. «Вун за кьилин кукӀвал кьада, вун за капан юкьвал кьада» — ибур ви гафар я.
Сардаров (КӀусни къайгьу авачиз, гуьзгуьдай вичелай вил аладариз). Ваз туш ни лугьузва? Лагьана гьакӀ. ГьакӀ авунни авуна. Къе эвичӀ зи кьилин кукӀвалай. ЭлячӀ зи капан юкьвалай.
Интизар (Ажугъ бамишарна, чемодан агализ). Гила зунни герек амач, зи бубани. Гила вун пулунив ацӀанва. Гьарамдин. Нез тахьурай вавай!
Сардаров. За ам неда. Вуна жуван язух чӀугу. Перестройкади тумунихъ къусу гелянавай ви бубадиз виликан кефер ахквадач. Заз ада вири рекьер ачухнава. Яшамишрай чи перестройка!
Интизар. Аквадайбур авахьрай, я аллагь, зи буба буьгьтенрик кутурбурун. Зи бубади вичин вири уьмуьрда михьидаказ кӀвалах авурди я.
Сардаров. Гьа-гьа-гьа! Михьидаказ? Райондин прокурорди? Зун адан езне гьавиляй хьайиди тир жал? Яраб затӀ алакь тийидай иран бубадикай за вучзавайтӀа? Эгь, хьайи кӀвалахар хьана алатна. Вучда абурукай тупӀалай хъувуна? Зунни ви бубадихъ галаз яшамиш жезвачир. Итимни паб я. Къе яшамиш жеда санал, пака чара жеда. Къе хуш жеда садаз сад, пака акунани кӀамукьдач. Рази хьана кӀанда жуван кьисметдал. Са камаллу инсанди лагьайвал: «Каждому свое».
Интизар. Гитлеран гафар я абур! Гьадан тербия вав гвайди заз акунва. Пул гана вав инсан шишинал акьалжиз тур. Гьич ялни вуна кьадач. Кабаб ийида вуна адакаи. Вун гьабурукай я.
Сардаров (стулдихъ галай пенжек алукӀиз гуьзгуьдал фида). Я, Интизар, я. Вал сифте зи фикир желб авурдини гьа и тӀвар тир. Заз а тӀвар алай макьам гзаф бегенмиш тир. РикӀел аламани? (Вальсдин жуьреда гъилер кьуна элкьвез, вичин сивяй макьам яда.) Хъсан макьам тир. Гьавиляй заз ви тӀварни хъсан акунай. Низ чидай адахъ къакъатунин метлеб авайди? Къакъатунин падежда авай мани хьана ви тӀвар алайди. ГьакӀ хьайила зак са тахсирни квач. Вакни. Тахсир гьа тӀварцӀинди я. Ада чун къакъудна.