А Б Д У С Е Л И М И С М А И Л О В
В А Х Т А Р И Н К Ь У Ь Л
ШИИРАР ВА ПОЭМАЯР
Дагъустандин халкьдин писатель Абдуселим Исмаилован ктабда гьатнавай эсерар уьмуьрдин туьк1вейвилерикайни зидвилерикай ва абур кьабулзавай инсандивай т1ебиатдихъ ва жуван руьгьдихъ галаз алакъайра вич инсан яз хуьз алакьунин важиблувиликай я.
ВУННИ АЛЛАГЬ – ЧИН-ЧИНА
АРАН ВАЦ1
Аран вац1ал гьалдна къавар,
Къайи яд физ к1аникай,
Къвезва пара ширин ахвар –
Гатуз вучда к1валикай!?
Ц1ал, пуд юкъуз хкахь тийиз,
Чразва шиш-кабабар.
Шегьердиз к1ан женни хъфиз,
Авурт1ани запабар!?
Я ван авач, я – къал, я – гум,
Рик1 т1арзавач хабарри,
Ивидикни кутазвач рум
Политикрин тапарри.
Вунни и вац1, вунни и там,
Вунни гьава гьамга тир,
Инсафсузри тавунвай рам
Чиркинвилин рандадив.
Вунни намус, вунни иман,
Вунни Аллагь – чин-чина…
Алатдали и терс заман,
Амукьнайт1а ик1 ина.
Алуддалди Арандин къав,
Зул хкатна гатухъай,
Хъуьт1уьн цик1и кьадалди дав
Зи уьмуьрдин вац1укай.
МИК1РИДИХЪ
Вирт хьиз кавча т1уруникай
Авахьзаваз дат1ана,
Макъан мик1ри рахуник ква
Ванцив дере ац1ана.
Шиш-кабабдин ни галай гум -
Элкъвез-хквез атир яз,
Алт1умиз зал иштягьрин рум,
Гьава хъваз таз чехир яз.
Макъун, пипин…- тарар кьакьан –
Кьил цававай лавгъабур,
Рик1ел хкиз йикъар накьан, Зи хиялриз тагъма гуз,
Акъвазнава, къайгъусуздиз
Акваз, амма дердер гваз:
-Катнава вун къариблухдиз,
Ватан и пак чилер яз…
Пурнидин ял, цикедин кун…-
Агь, булвилер таварин…
За рик1икай ч1угвазва ч1ун,
Хъваз туькьуьлвал накъварин.
Чан кумачир харап1айри,
Сурарини рекьери
Тунва тама сес гьарайдин,
Шел-хвалдинни йикьерин…
Мик1ридин ван япа аваз,
Хъваз пак гьава чехир хьиз,
За яб гузва жува жуваз
Гьазурзавай эхирдиз.
Беденни руьгь авуна ч1икь,
Акъудзавач финдикьни,
Вилералди хьана тестикь
Уьмуьрни ва кьиникьни.
* * *
К1анчни ихьтин гуьрчегвал
Аквадай кьве вил,
Тестикьардай керчеквал -
Яна пелез гъил.
К1анчни ихьтин чилерал
Къекъведай кьве к1вач, Синерилай синерал
Лугьудай ваз:- Вач!
К1анчни ихьтин ерияр
Гьакьдай са хур, рик1,
Баябан ва гъейри яз
Тан тийидай ик1.
К1анчни гьунар, гьунаррихъ
Тухудай са кьил –
Чешнедалди бубайрин –
Вун, зи Ярк1и чил!
КЪУГЪВАНДАЛ
Серес югъ я Къугъвандал.
Зунни сифте сеферда
Ава ина мугьманда.
Таза як1ун ниэр тваз,
Гьер ргазва къажгъанда.
Гитин дагъдин къужахда,
Шагь дагъларин дамахда…
Зунни ц1ийи кваг хьана
И гиширлу сачахда.
Амма ч1урна иштягь зи
Шаирвилин темягьри,
Акваз хуьрер, бинеяр